Pasi kreu krimin, Ylber Jaku ka bërë një postim në rrjetet sociale lidhur me vrasjen
Personi në foto është 41-vjeçari Ylber Jaku, i cili vrau me armë zjarri pasditen e sotme në Has, 34-vjeçarin Ryshyt Sallahu, pas një konflikti mes familjeve të tyre për motive pronësie.
Pasi kreu krimin, Ylber Jaku ka bërë një postim në rrjetet sociale lidhur me vrasjen, ku krahas fotos së tij, shkruan: “Mu desh të vrisja njërin prej tyre thjesht duke përdorur një pistoletë. Arsyeja ishte e qartë për t’u dhënë një mësim të tjerëve…!”
Po ashtu, vetëm një natë më parë, Ylber Jaku kishte publikuar në rrjetet sociale një foto të tij, të shoqëruar me një mesazh të drejtpërdrejtë që shihet si paralajmërim për familjen Sallahu:
“Mjaft është Mjaft! Kur ju injoroni (drejtësinë) njerëzit nuk ju injorojnë ju!”
Mësohet se dy ditë më parë, pjesëtarë të familjes Sallahu dhunuan babanë dhe nënën e autorit. Dy prindërit e autorit ndodhen në spitalin e Traumës, ku po marrin ndihmë mjekësore.
Sot, 41-vjeçari ka marrë armën dhe ka vrarë 34-vjeçarin në shenjë hakmarrjeje për dhunë ndaj prindërve të tij. Burime bëjnë me dije se konflikti për motive pronësie mes familjes Jaku dhe Sallahu vijon prej mbi 10 vitesh. Familja Jaku ka bërë mbi 20 kallëzime ndër vite për konfliktin Kallëzimet janë bere nga babai i autorit i cili u kërkonte institucioneve zgjidhjen e konfliktit.