Numërimi i votave të diasporës ka arritur 30%, me PS që kryeson me 53.55%, rreth 1% më shumë se në Shqipëri, ndërsa PD ka rënie me 5%.
Adriatik Lapaj me Nismën Shqipëria Bëhet ka shënuar rritje të ndjeshme, duke kërcënuar një të PS në Fier dhe një të PD në Vlorë. PS udhëheq në 10 qarqe, ndërsa opozita ruan vetëm Kukësin dhe Shkodrën. Mbetet pezull numërimi për votën nga Greqia.
Procesi i numërimit të votave të diasporës vijon, ndërsa deri tani janë numëruar 61,095 zarfe nga 194,889 gjithsej ose mbi 30% e totalit. PS kryeson me mbështetje, ku aktualisht ka marrë 32,449 vota, që përfaqësojnë 53.55% të totalit të votave të diasporës. Krahasuar me rezultatin brenda vendit (52.2%), PS ka mbështetje rreth 1% më të lartë në diasporë.
Partia Demokratike me aleatët ka marrë 17,669 vota, që përfaqësojnë 29.16% të totalit të votave të numëruara. PD ka pasur mbështetje më të fortë brenda Shqipërisë (34.1%), ndërsa në diasporë të dhënat tregojnë se ka një rënie të mbështetjes me 5%.
Në diasporë, renditet i treti Adriatik Lapaj me koalicionin Nisma Shqipëria Bëhet me 5,084 vota, ose 8.39% të totalit. Lapaj ka pasur një rritje të ndjeshme në diasporë me 4.8% më shumë se vota brenda vendit.
Rezultatet e diasporës mund të prodhojnë surpriza. Tashmë që numërimi i votave brenda vendit thuasje ka përfunduar, do të jetë vota e diasporës që do të përcaktojë ndarjen e mandateve edhe pse në një numër shumë të vogël, të paktën 2 ose 3.
Një garë të fortë po bëhet me votën e diasporës në 3 qarqe, ku Lapaj po rrezikon mandatet e dy partive më të mëdha politike. Në Vlorë Lapaj mund t’i marrë një mandat PD, në Fier rrezikon t’i marrë mandatin PS, e cila mund të zbresë nga 12 në 11 mandate. Në Lezhë PS mund t’i marrë PD një mandat dhe të përmbysë sërish rezultatin me votën e diasporës, 4 me 3 në favor të saj.
Të dhënat tregojnë se PS kryeson në 10 qarqe, Berat, Dibër, Durrës, Elbasan, Fier, Gjirokastër, Korçë, Lezhë, Tiranë e Vlorë, ndërsa opozita arrin të mbajë vetëm dy bastione në veri, Kukës dhe Shkodër.
Edhe pse KAS rrëzoi vendimin e KQZ, numërimi i votave për Greqinë ende nuk ka nisur, pasi presin vendimin e zbardhur të KAS. PS kërkoi nga KAS shfuqizimin e një akti të kryekomisionerit që parashikonte që çdo zarf nga diaspora që kontestohet, të lihet mënjanë me një kuti të posaçme. Ky vendim erdhi pas kontestimit të PD për votën e Greqisë, por akti i Celibashit u rrëzua nga KAS.
Rezultatet deri më tani
Koalicioni Partia Demokratike – Aleanca për Shqipërinë Madhështore (PD-ASHM) → 29.09%
Lëvizja Bashkë (BASHKE) → 2.64%
Lëvizja Atdheu (LA) → 0.14%
Partia Koalicioni Euroatlantik (KEA) → 0.71%
Partia Socialiste e Shqipërisë (PS) → 53.61%
Koalicioni Nisma Shqipëria Bëhet (NISMA-SHB) → 8.36%
Partia Aleanca Kombëtare Shqiptare (AKSH) → 0.59%
Partia Aleanca Demokracia e Re (ADR) → 0.06%
Koalicioni Djathtas për Zhvillim (DZH) → 0.29%
Partia Mundësia (MUNDESIA) → 3.41%
Partia Socialdemokrate (PSD) → 1.11%
Lajm në përditësim….