Në prag të ndeshjes së shumëpritur mes Shqipërisë dhe Serbisë, që do të zhvillohet më 7 Qershor 2025 në stadiumin “Arena Kombëtare” në Tiranë, Policia e Shtetit ka ndërmarrë masa të rrepta sigurie për të garantuar mbarëvajtjen e këtij aktiviteti sportiv.
Plani i masave përfshin:
- Eskortimin dhe sigurimin e ekipeve kombëtare të të dy vendeve nga dhe drejt aeroportit, hotelit dhe stadiumit.
- Kontrolle të imtësishme në dhe rreth stadiumit për të parandaluar futjen e sendeve të ndaluara si fishekzjarrë, flakadanë, lëndë piroteknike dhe objekte të tjera të rrezikshme.
- Angazhimin e qindra efektivëve të policisë për të monitoruar rendin publik në të gjithë qytetin e Tiranës para, gjatë dhe pas ndeshjes.
- Sigurimin e rrugëve për shërbimet e emergjencës dhe menaxhimin e trafikut rrugor në qytet.
Për të shmangur incidentet, Policia ka vendosur kufizime të qarkullimit të mjeteve në disa akse rrugore në afërsi të stadiumit nga ora 15:00 deri në përfundim të ndeshjes.
Gjithashtu, është bërë apel për tifozët që të mos ngrenë dronë në perimetrin e sigurisë përreth stadiumit, pasi do të përdoren pajisje anti-dronë për t’i rrëzuar ato.
Policia ka paralajmëruar ndëshkime të rënda për çdo shkelje të ligjit gjatë ndeshjes, duke përfshirë gjoba dhe burgim për veprime të dhunshme, futjen në fushë pa autorizim dhe përdorimin e sendeve të rrezikshme.
Tifozët janë këshilluar të paraqiten në hyrjet e stadiumit në orën 18:00 për të shmangur vonesat dhe të mos publikojnë biletat e tyre në rrjetet sociale për të parandaluar dublikimin e tyre.