Elton Ilirjani: Jam emocionalisht i rënduar, i dobët emocionalisht, por jo i dobët për të çuar para atë që nisa.
Parashqevia në këto momente ndodhet në dhomën e hotelit, është shumë e lumtur pasi më në fund pati bisedën me djalin dhe ish-bashkëshortin.
Dua të nis nga momenti kur Parashqevia u gjet. U gjet nga Elvira që e do kaq shumë. Pavarësisht sa është sulmuar ajo, ajo bëri ç’mundi në ato momente. Duhet t’i lëmë mënjanë këto pse e kapët me kamerë, pse e nxorët. Edhe gazetarja e ABC Neës që erdhi dje tha e pashë që ajo ishte një grua e fisshme që nuk i shkonte rrugës.
Unë Elvirën e njihja në Instagram, më vjen keq që nuk e kam njohur më parë personalisht. Kur pashë videon, kontaktova vajzën e Elvirës. I thashë i thuaj mamit ta mbaj dhe do të vij unë. Po kthehesha nga Majemi.
Vidën e kisha pasur para tre ditësh, ma dërgoi Ervin Kurti. Mendoja që unë isha këtu në shtëpi dhe ajo ishte jashtë në të ftohtë. Thosha si mund të fle tani kur Parashqevia është në rrugë. Në mëngjes e marr Elvirën dhe e pyes, ajo po qante se s’po e gjente e dot. Kur e gjeti, lashë çdo gjë dhe shkova atje.
Parashqevinë e gjej të ulur, i afrohem, doja ta përqafoja, por më tha kam qenë në rrugë dhe nuk mbaj erë të mirë. Më kishin thënë që ajo është e sëmurë, nuk është e sëmurë.
Ajo ka ndenjur 8 vite jashtë dhe i shkëlqen fytyra. E kisha paragjykuar Parashqevinë. Shumë persona më këshilluan ta çoja në spital, sepse do të ikte. Por ajo nuk është e sëmurë, ajo më tregoi që për tetë vite po rrinte në stacion për të pritur djalin.
Si ndryshoi gjithçka në këto 3 ditë?
Elton Ilirjani: Çdo gjë që është deri më tani për Parashqevinë është bërë pa dashuri. Është trajtuar sikur është një plaçkë, sikur ajo nuk është mirë. Unë mendoj se është hedhur shumë baltë dhe dashuria që unë dhe Elvira i treguam, bëri që ajo të hapej. Ajo më tha kam 20 vite që këndoj, më tha më incizo që shqiptarët ta dëgjojnë. Jam përpjekur mos ta nxjerr në asnjë moment keq.
Si ishte takimi i Parashqevisë me djalin?
Elton Ilirjani: Jam një person që e respektoj privatësinë. Bëra të mundur që të bëhej takimi dhe Parashqevia u ul në një ambient tjetër, foli në videocall me djalin dhe ish-bashkëshortin. Kur mbaroi, më tha ti e mbajte premtimin, unë do të rikthehem në skenë dhe do të marr sërish besimin e djalit tim. Sëmundja e vetme e Parashqevisë është mungesa e djalit.