Një nga të mbijetuarit britanikë të aksidentit ajror të ndodhur ditën e sotme në Ahmedabad ka treguar momentet e fundit para përplasjes së avionit të Air India-s.
Vishwash Kumar Ramesh, 40 vjeç, duke folur për gazetën Hindustani Times, ka rrëfyer përvojën dramatike që përjetoi në bordin e fluturimit AI171 që po udhëtonte drejt Londrës.
“Tridhjetë sekonda pas ngritjes, dëgjuam një zhurmë të madhe dhe më pas avioni u rrëzua. Gjithçka ndodhi shumë shpejt,” tha Ramesh, i cili jeton në Londër prej më shumë se 20 vitesh dhe ndodhej për vizitë në Indi tek familjarët.
Ai raportohet të ketë pësuar dëmtime në gjoks, sy dhe këmbë. “Kur u zgjova, trupat ishin gjithandej rreth meje,” shtoi ai.
Sipas dëshmisë së tij, Ramesh arriti të largohej vetë nga rrënojat dhe të kërkonte ndihmë: “Isha i frikësuar. U çova në këmbë dhe vrapova. Copëza të avionit ishin kudo. Një person më kapi dhe më çoi në ambulancë, pastaj për në spital.”
Ai udhëtonte bashkë me vëllain e tij, Ajay Kumar Ramesh, 45 vjeç, i cili ishte ulur në një rresht tjetër brenda avionit. “Vizituam Diu. Po udhëtonim bashkë, por tani nuk e gjej më. Ju lutem më ndihmoni ta gjej,” apeloi Ramesh nga spitali.
Avioni Boeing 787-8 Dreamliner i Air India u rrëzua rreth një minutë pas ngritjes nga aeroporti i Ahmedabad-it, në një zonë të banuar. Fluturimi kishte nisur në orën 13:38 me orën lokale dhe transportonte gjithsej 242 persona në bord: 169 shtetas indianë, 53 britanikë, 7 portugezë dhe 1 kanadez.
Policia e Ahmedabad-it konfirmoi përmes një deklarate se një person i ulur në vendin 11A ishte nxjerrë i gjallë dhe është në trajtim mjekësor.
“Nuk mund të konfirmojmë ende numrin përfundimtar të viktimave,” tha komisioneri i policisë GS Malik. Shifrat paraprake tregojnë se bilanci mund të jetë i rëndë, ndërsa forcat e emergjencës janë ende në vendngjarje.