Gjykata e Tiranë ka vendosur të veçojë çështjen ndaj imamit Ahmet Kalaja, i cili akuzohet për veprën penale
“Veprime që pengojnë zbulimin e të vërtetës”, kryer në bashkëpunim, një vepër që parashikon dënim me gjobë ose deri në tre vite burg.
Bëhet me dije se në seancën e sotme, Kalaja nuk ishte i pranishëm, por u përfaqësua nga avokati i tij. Ndërsa, të akuzuarit e tjerë të përfshirë në këtë hetim janë kaluar për gjykim.
Kalaja, i cili drejton xhaminë “Dine Hoxha” në rrugën e Kavajës, akuzohet se ka penguar hetuesit gjatë një operacioni të drejtorisë së antiterrorit në vitin 2022, duke refuzuar të dorëzojë pamjet e kamerave të sigurisë të vendosura në ambientet e xhamisë.
Hetimet kishin të bënin me persona që dyshohej se shpërndanin fletushka me përmbajtje që nxisnin urrejtjen dhe përçarjen mes besimtarëve.
Çfarë ka ndodhur 3 vite më parë
Neësbomb.al ka pasqyruar në Korrik 2022 një denoncim të hoxhës që drejton Xhaminë “Dine Hoxha” në Tiranë, për një efektiv të Drejtorisë së Antiterrorit që sipas tij atëkohë shantazhonte djemtë që punonin në Xhami dhe ju kërkonte që të bëheshin spiuna. E gjithë ngjarja ka nisur pas shpërndarjes së disa fletushkave në Xhami nga persona të panjohur.
“Zotëria polici antiterrorit në bisedë kafeje u interesua edhe i dham atij aq informacion aq sa lejonte etika, po edhe dinim (pasi nuk i njohnim të rinjtë as me emra as me mbiemra) sepse siç e thashë ne nuk varemi si institucion nga AntiTerrori po nga Myftinia Tirane”, shkruante Ahmed Kalaja.
Madje, hoxha denonconte atëkohë se polici i Antiterrorit kishte sharë djemtë e Xhamisë “Dine Hoxha” duke përdorur një gjuhë të papërshtatshme për një vend të tillë.
“Vjen në xhami edhe shantazhon edhe kërkon bashkpuntorë në emër të asaj që videoja është fshirë qëllimisht; kur deshtoi sukseshem edhe ju paraqit atij deklarata se vetem imami është përgjegjës e askush përveç tij ai vetëm turfullonte edhe thotë textualisht; ” … e di une si e donit ju tju nxirrja tgjithve prej b… jashtë… ” gjë që është filmuar edhe ruajtur edhe zotërojmë nga kamerat e Xhamisë. Me çfarë të drejte ky polic i antiterrorit shan në xhami edhe flet në atë gjuhë?!”
Siç duket, autoritetet kanë vendosur t’i shkojnë deri në fund këtij rasti dhe organi i akuzës së kryeqytetit ka dërguar për gjykim dosjen ndaj imamit të njohur Ahmet Kalaja, si i akuzuar për veprën penale “Veprime që pengojnë zbulimin e të vërtetës”, kryer në bashkëpunim.